Sasapedahan ka Baduy

Jembatan koneng Cisimeut, Sabtu (29/1/2022) jam 12.28 pas 13.35 nyampe di Ciboleger. Balikna teu liwat Cisimeut tapi ka Cibungur. Umur jembatan sarua jeung umur sepedah teu jauh beda. Jembatan diresmikeun ku Bupati Lebak H. Didin Muchjidin, 5 September 1996.

Ti Rangkas indit jam 10 bareng Jeni Abdul Rokhim jeung rombongan ti Serang anu lobana180 urang. Rombongan mah dalahar heula di Polsek Leuwidamar, kami mah laju ka arah Cisimeut.

Jalanna mulus. Loba tanjakan jeung turunan. Jigana pesepeda balapmah bakal kabita jalur ieu. Nepi di pertigaan anu rek ka Muncang jeung ka Cisimeut reureuh heula sabab bitis rada pegel. Jeni mah santai wae da manehna mah ka Anyer geh bulak balik ti Rangkas geus biasa. Ka Baduy geus puguh. Bahkan sok dititah ku lembagana pikeun survei jalan sasapedahan.

Reureuh 10 menit laju ka arah Cisimeut. Asa waraas. Sababna ieu jalan sering pisan diliwatan basa masih di Ciseel. Sok mawa barudak ulin ka Baduy naek kolbak atawa treuk. Pas di jembatan koneng Cisimeut teu kawawa hayang moto. Jepret, jepret. Sakalian moto sapedahna.

Tuluy gowes deui. Kami papisah. Jeni mah ceunah rek nungguan di Ciboleger da kami mah boyot. Sajajalan luak lieuk bari mun seug amprok jeung tanjakan anu luhur mah, sapedahna ku kami ditungtun.

Nyampe di Ciboleger geus loba sapeda rombongan urang Serang. Da maranehna mah liwat jalur Cibungur. Jalur biasa kendaraan anu rek ka Baduy.

Kami istirahat sa jam. Tuluy ngeurueyeuh balik. Jalur balik beda jeung jalur indit. Jalurna rada tarahal. Jeni nyarita rada teu enah awak. Manehna sababaraha kali katingali eureun. Kesang ngucur jeung beungeutna geuneuk. Cenah geus lila tara sasapedahan rutin. Kami ditirah ti hareup. Tapi can lila geus kasusul deui.

Jalanna leuwih lebar. Da puguh ieumah jalan utama ka Baduy. Sisi kiri jeung kananna keur dibeberes. Aya beko anu keur digawe. Katingali jalanna leuwih lebar deui.

Di sapanjang jalan loba pisan budak leutik anu nyumangetan. Maranehna nyelukan anu sasapedahan. Kami mah seneng. Bari dadah-dadahan ka manehna. Eta teh ti indit keneh. Nepi ka balikna. Boh di jalur Cisimeut oge di jalur Cibungur. Resep pisan, pokonamah.

Jalur Cisimeut biasana ka liwatan ku para pesepeda anu datangna ti arah Bogor. Urutanna: Bogor-Jasinga-Gajrug-Ciminyak-Cisimeut-Ciboleger.

Nepi di pertigaan Polsek Leuwidamar sakira pas adan Asar. Neangan tukang sangu. Dahar heula. Asar di masjid di Cimarga. Samemeh magrib geus di Museum Multatuli deui.